Salamat
15-01-2008, 20:15
أتوبيسات خربانة ومراكب غرقانة وعمارات بتقع وقطارات بتولع..الحكومة متفقة مع الحانوتية
الست الزنانة أم لسان زالف.. قابلتني مرة تانية وأنا في السوق.. وهاتك يا رغي وزن..
قال إيه صعبان عليها العمارة اللي وقعت في إسكندرية والناس اللي ماتوا.. وإن جيتوا للحق حاجة تحزن وتقهر وتفرس.. فضلت تزن وتقولي: تصوري إن العمارة كانت مخالفة ست أدوار، والهانم صاحبة البيت الله يجازيها مظبطة ورقها مع بتوع الحي، وهما مروقين نفسهم مع المهندسين، ودوكهم مماينين مع المقاولين، ودولا مع البنايين.. يعني كله بيشتغل علي كله.. طبيخ في طبيخ..
يغيروا رئيس الحي والحبايب اللي معاه ويحطوا غيره... وهلم جرا...
قلتلها بطلي زن يا زنانة وخليكي في حالك.. ده كله قضاء وقدر.. وإن شاء الله يكونوا شهداء.. قالتلي مقلناش حاجة بس ربنا بيسبب الأسباب.. وبعدين هي دي أول عمارة بتقع، ده ياما بيوت وقعت علي نافوخ سكانها وقعدوا ياعيني عليهم في الشارع، والخيام، ومساكن الإيواء.. بسبب الإهمال والاستغفال والغش.. بس اطمني بكرة ينسوا زي كل حاجة ما بتتنسي..
قلتلها متحشريش نفسك في اللي ملكيش فيه.. ويمكن بكرة يكون أحسن من النهارده.. قالتلي: ماشي حسكت بس انتي عاجبك يعني القطارات اللي بتولع ومترو الانفاق اللي بيدلع، والمراكب الغرقانة، والطيارات والأتوبيسات الخربانة..
والأكاده كل مرة يا قلبي يحطوا كبش فدا في وش المدفع يشيل الليلة.. الواحد مش عارف العيب فينا ولا في حبايبنا.. ان جيتي للحق (أنا حطق)... الواحد مش عارف وبقي خايف يركب إيه يوصله في الزمان ده.. معدش فاضل غير إننا نركب لمؤاخذة (الحمار أو الجمل).. وأهي توصيلة والسلام وعلي رأي المثل.. (حمارتك العارجة تغنيك عن سؤال اليتيم).
قلتلها اسمها اللئيم يا زنانة.. قالتلي عارفة ما أحنا بقينا أحنا وهما أيتام في أيتام مين فينا معندوش أب أو أخ أو أم أو صاحب أو حتي واحد صعبان عليه راح في الوبا، قلتلها شكلك مش حتجبيها (البر) يا زنانة.. قالتلي معدش فيه أصلاً (لا بر ولا بحر ولا جو ولا حتي أرض) قطيعة..
وإن قعدنا في بيوتنا حتطربق علي دماغنا.. حاجة تقرف.. قلتلها حطي لسانك في بقك بقي.. قالتلي ماشي بس أقولك علي حاجة حلوة الناس بتوع بره الخوجات دول أخترعوها اسمها أبصر إيه (المكوك).. بفكر السنه دي أعمل جمعية انا وابو العيال نقبضها الأول ونشتري واحد بالقسط.. نركبه وطيران علي بلد تانية وعيشه تانية وضماير تانية.
بس يا رب يسيبونا في حالنا والعمر يطول لغاية ما نشتري واحد ونهج.
منال غالب
الست الزنانة أم لسان زالف.. قابلتني مرة تانية وأنا في السوق.. وهاتك يا رغي وزن..
قال إيه صعبان عليها العمارة اللي وقعت في إسكندرية والناس اللي ماتوا.. وإن جيتوا للحق حاجة تحزن وتقهر وتفرس.. فضلت تزن وتقولي: تصوري إن العمارة كانت مخالفة ست أدوار، والهانم صاحبة البيت الله يجازيها مظبطة ورقها مع بتوع الحي، وهما مروقين نفسهم مع المهندسين، ودوكهم مماينين مع المقاولين، ودولا مع البنايين.. يعني كله بيشتغل علي كله.. طبيخ في طبيخ..
يغيروا رئيس الحي والحبايب اللي معاه ويحطوا غيره... وهلم جرا...
قلتلها بطلي زن يا زنانة وخليكي في حالك.. ده كله قضاء وقدر.. وإن شاء الله يكونوا شهداء.. قالتلي مقلناش حاجة بس ربنا بيسبب الأسباب.. وبعدين هي دي أول عمارة بتقع، ده ياما بيوت وقعت علي نافوخ سكانها وقعدوا ياعيني عليهم في الشارع، والخيام، ومساكن الإيواء.. بسبب الإهمال والاستغفال والغش.. بس اطمني بكرة ينسوا زي كل حاجة ما بتتنسي..
قلتلها متحشريش نفسك في اللي ملكيش فيه.. ويمكن بكرة يكون أحسن من النهارده.. قالتلي: ماشي حسكت بس انتي عاجبك يعني القطارات اللي بتولع ومترو الانفاق اللي بيدلع، والمراكب الغرقانة، والطيارات والأتوبيسات الخربانة..
والأكاده كل مرة يا قلبي يحطوا كبش فدا في وش المدفع يشيل الليلة.. الواحد مش عارف العيب فينا ولا في حبايبنا.. ان جيتي للحق (أنا حطق)... الواحد مش عارف وبقي خايف يركب إيه يوصله في الزمان ده.. معدش فاضل غير إننا نركب لمؤاخذة (الحمار أو الجمل).. وأهي توصيلة والسلام وعلي رأي المثل.. (حمارتك العارجة تغنيك عن سؤال اليتيم).
قلتلها اسمها اللئيم يا زنانة.. قالتلي عارفة ما أحنا بقينا أحنا وهما أيتام في أيتام مين فينا معندوش أب أو أخ أو أم أو صاحب أو حتي واحد صعبان عليه راح في الوبا، قلتلها شكلك مش حتجبيها (البر) يا زنانة.. قالتلي معدش فيه أصلاً (لا بر ولا بحر ولا جو ولا حتي أرض) قطيعة..
وإن قعدنا في بيوتنا حتطربق علي دماغنا.. حاجة تقرف.. قلتلها حطي لسانك في بقك بقي.. قالتلي ماشي بس أقولك علي حاجة حلوة الناس بتوع بره الخوجات دول أخترعوها اسمها أبصر إيه (المكوك).. بفكر السنه دي أعمل جمعية انا وابو العيال نقبضها الأول ونشتري واحد بالقسط.. نركبه وطيران علي بلد تانية وعيشه تانية وضماير تانية.
بس يا رب يسيبونا في حالنا والعمر يطول لغاية ما نشتري واحد ونهج.
منال غالب