شويه صور ........(وهي الحياه ايه غير شويه صور)

[amanyxz]

ما هي الحياة ايه غير شوية صور ...صورة واحد بيبكي ..وصورة واحد بيفرح ..صورة واحد بيبني وصورة واحد بيهدم ... صورة واحد بيحب وواحد بيكره ....هي دي الحياة شوية صور جنب بعض.

جبت مجموعة صور ...ما تيجوا نتكلم عليها شوية .

http://almoslm123.jeeran.com/american.jpg

الصورة دي وقفتني قدامها كتير ...يا ترى العسكري الأمريكي ده بيعيط ليه ..وهو ماسك الطفل العراقي ده اللي مات في احدى الغارات الأمريكية ؟؟ يا ترى كان حاسس بأيه ساعتها يا ترى كان شعوره إيه وهو شايف إنه بين يوم وليلة تحول لقاتل وسط جيش من القتلة بيخرب بلاد لا هي حاربتهم ولا وقفت قصادهم ؟

صعب اوي انك تفضل ماشي في طريق غير الطريق اللي كنت راسمه لنفسك ...صعب اوي تعمل كل شيء انت كارهه صعب اوي تقتل وانت بتحب الحياة ..صعب اوي تكره وانت ما بتحبش غير كل الخير للناس ...

يا ترى كام إنسان في الدنيا دي صحى ولقى نفسه كده بقى في يوم وليلة ..انكتب يعيش حياته قاتل و سفاك دماء رغم انه من جواه انسان طيب .


http://almoslm123.jeeran.com/station.jpg

الصورة دي عجبتني اوي ...كانت في محطة مصر بالأسكندرية ....مش عارف ساعات تمشي في الشارع تقول الشعب ده خلاص فقد الدين ...الشعب ده خلاص عليه العوض ...الشعب ده اللي بيعمله مبارك والحزب الوطني فيه حلال عليه .....ما يهمكش المناظر ...أحنا فقدنا الدين في معناه الحقيقي ..كله بيجري على مصلحته ويضر الباقيين ..كله مستعد يشفط دم كله .وناس بتاكل في بعضها وتكره وتحقد وتغل في نفسها على بقية الناس ...وكله عايش ممكن ما يكونش بيعمل حرام ..لكنه لو جتله فرصة حرام فهو بالتأكيد مش حيفوتها ....لكن مرة واحدة وفي نص كل العتمة دي بتظهر صورة وتقول والله الناس برده لسه فيها خير


http://img186.echo.cx/img186/2781/shoubra00418al.jpg

الصورة دي بقى لواحدة كانت بتبيع ذرة في الشارع ..وبعدين عدوا من جنبها الناس بتوع كفاية في مظاهرة ليهم ..لما عرفت انهم بيهتفوا ضد الرئيس فضلت تزرغد ...وقاموا حطوا لها لا لمبارك على صدرها ...لو كل الشعب زي الست دي ..لو كلنا ما خفناش لو كلنا اتكلمنا كان اكيد وضعنا ممكن حيكون حاجة تانية ..اكيد الست دي كانت خايفة زينا كلنا في يوم من الأيام ...اكيد كانت بتوصي عيالها يمشوا جنب الحيط ...وما يتكلموش في السياسة ..لكنها مرة واحدة حست انها لازم ترفع عن نفسها الخوف ..لازم تقول مرة واحدة في حياتها لأ ..لازم في لحظة تقول كفاية ..لازم تقول كفاية لنفسها الأول قبل ما تقولها لمبارك ..لازم تقول كفاية سلبية كفاية خوف ..لو مرة واحدة فقنا في عمرنا . و مرة واحدة نفضنا سلبيتنا وخوفنا عننا .مرة واحدة بس ...مرة واحدة بس ...مرة واحدة يا عالم ...اكيد كان وضعنا ساعتها حيتغير كتير .

فكرتني برده بمظاهرة كنا فيها في جامعة الأسكندرية ..وجت بعدها واحدة وفضلت برده تزغرد ...وقالت لنا انتوا عاملين مظاهرات ليه قلنا لها علشان فلسطين ..قالت طيب ما تتظاهروا علشان العيشة اللي بقت غالية ...احنا ما بقناش عارفين نأكل عيالنا


http://almoslm123.jeeran.com/amn.jpg

هي دي البلد ...عشر عساكر على كل مواطن ..هي دي البلد ...انا مش عايز اتكلم على المواطن المقهور انا عايز اتكلم على العسكري..العسكري ده طالع عينه ..كرامته ملغية ..العيشة مرة عليه ..ممكن يكون ابوه او اخوه مش لاقيين ياكلوا ..مش لاقيين بتعالجوا ..ومع كده عنده اخلاص شديد في القمع ..مين اللي لغى شخصية العساكر دي ومسح امخاخها وخلاهم في يوم وليلة يبقوا اعداء لوطنهم ولأحلام وطنهم ..مين ؟؟؟ مين ؟؟

مين نكس الفطرة ..مين ربى في الناس دي حب العدوان مين ربى فيهم ان كلهم عايز يبقى مرضي عنه من الظابط فيقدم اكتر واكتر ..ويضرب اكتر ويقتل اكتر ويشوه ويعور اكتر واكتر .

مش العسكري بس اللي كده ..الطالب اللي بيمشي في الجامعة يدور على اسامي الطلبة الناشطين سياسيا علشان يبلغ عنهم ..والبقال اللي تحت البيت اللي شغال مرشد مباحث امن الدولة ..وصحابك اللي في الشغل ..اللي ما تقدرش تتكلم في السياسة قدامهم علشان ما يبلغوش عليك رئيسك ..مين اللي غير في الناس ..هو فيه حد لعب في الجينات المصرية ..ولا هي جيناتنا مضروبة من يومها

هي دي مصر بلد الأمان ..هي دي مصر بلد الأمن ؟؟

اكيد النمرة غلط .



_____________________________منقول

[amanyxz]

http://almoslm123.jeeran.com/child.jpg

هي دي الحرب ...ناس تكسب وناس تخسر .الصورة من المعارك الأخيرة في الصومال .اللي خسروا هربوا خارج البلاد على قوارب برعاية امريكية ...واللي كسبوا خلاص مسكوا الحكم ....لكن اللي مات مين يا ترى يفتكره مين يا ترى يمسح دموع الطفل ده..الطفل بيشد والدته ويصحيها ..وينادي عليها تصحى ...اصحي يا امي انا جعان ..انا تعبان انا عايز مسحة الحنان ...بكى علشان يضغط عليها نفسيا ً ..علشان تقوم بقى من نومها ..ماهو لازم كل يوم يضغط على اعصابها ويبكي علشان تصحى وتجري عليه ...تشوفه عايز منها إيه ..لكنه ما يعرفش انها خلاص ..دي النهاية ..نهاية امه وإنه خلاص مهما بكى عمرها ما حتصحى ..عمرها ما حتديله مسحة الحنان ...وانه اتكتب عليه انه يتيتم علشان قضية ما يعرفهاش ..و ناس ما يعرفهاش وهما برده مش عايزين يعرفوه


http://bqwert.jeeran.com/1.jpg

صورة ملفقة ..وغير حقيقية ..ومتركبة ..انتشرت على الأنترنت ان هذه جثة انسان عملاق من عصر سيدنا آدم عثر عليها في السعودية ..اعضاء منتدى الساخر تتبعوا الصورة واكتشفوا ان اصلها منتدى لملحدين يستهزأون بالأسلام وركبوا هذه الصورة ليتابعوا سذاجة المتدينين ( على حد قولهم )...الصورة رغم وضوح التركيب فيه ..ورغم سذاجة الفكر إلا انها تنتشر على النت انتشار النار في الهشيم ..هو ده الأنترنت في البلاد العربية...
للعلم من الصورة المتركبة وللأسف صورة الكعبة والمسجد النبوي وهي منورة من الأقمار الفضائية ...الصورة طعلت مزورة ..وغيرها وغيرها كتير جدا .و القصص المفبركة وغيرها ..اللي تنشر بأسم الدين كل يوم انت بتفتح ايميلك فبتلاقي ميت قصة كلها كذب ..وميت خبر كذب ...وميت صورة كذب ..هو ده الأنترنت ..هو ده النقلة العصرية في عالم المعلومات

____________________ منقول

[Dr.Hamzeh Malkawi]

موضوع محزن وبخلي الواحد يشمئز من هيك ظَلَمَة ، ودايماَ بلعبوها الكبار والخسرانين همّ الشعوب الكحيانة ، ولكنّ اللّه يعلم كل شيء وسيطولهم عقابه سبحانه وتعالى ..ولأنّ بعض الناس - بل الكثير - يصفقون لأشياء هي بالأصل ضدّهم كنت قد كتبت موضوعاَ سابقاَ
بعنوان : ( فليسقط واحد من فوق ) ولكن ومع الأسف لايزال الكثيرون لايعلمون اللعبة التي تدور حولَهم ، وقد فوجئت بأعضاء مثقفين لم يفهموا ذلك الموضوع..!!!؟.

[** حــــــورس **]

ساعات الواحد بيسكت شوية علشان يقول : اللــــــــــــــــه

تسلم ايدك يا اماني بجد الموضوع هايل وقلب المواجع علينا


بالمناسبه

حكاية 10 عساكر لكل مواطن والضرب والسحل
اقري القصيده دي
مش ليا طبعا هي لشاعر ( مبقوق ) من اللي بيحصل

ضرب سحل مفيش كلام
الكبير عاوز تمام
اضربوا كل اللي ينطق
واللي ساكت واللى بان
خلو شعبي يعيش جبان
اضربوا مني الأمان
اضربوا كل اللي صور
واللي فكر يوم يحور
الجزيرة ويا رويتر
والمحور ويا البيان
واللي فجأة طلعلوا صوت
اضربوه خليه يموت
خلوا شعبي يعيش ذليل
واحبسوه من غير دليل
خرجوا كل الكلاب
يضربوا من غير حساب
طفل ست شيخ كبير
اضربوا الشعب الحقير
اضربوا كل القضاة
وقولوا عنهم دول طغاه
بس اوعوا تيجى سيرتى
ولا تطلع مرة صورتى

[محسوبكم]

أماني
اقسم بالله احزنتي
الصورة الأولـــــــــــى
مشكور يا دكتورة

[هيلانة]

فعلا يا اماني .............هي الحياة شو غير شوية صور .............تسلمي على هالموضوع ..............والله بجد قلبتي علينا المواجع ....فعلا دكتورة؟؟:g1

[aLoNe]

لا حول ولا قوة إلا بالله العلي العظيم على الظلمة والمفترين ,,,
صور معبرة وهي تتحدث عن ذاتهاوعن القهر والظلم ,,,
دمت بخير وعافية ورضا من الرحمن ,,,

[amanyxz]

مشكورين اخواتي علي مروركم
ده واقع بلدنا واحنا الشعب متاخد في الرجلين
ربنا يستر علينا
شكرا اخي حورس علي القصيده
في قصيده في ساحه الشعر اسمها بلد العجايب اقراها

[لينـا]

اماني هدول مش صور وانما حكايات لامم بحالها
وجعني قلبي
بعين الله
شكرا يا اماني

[amanyxz]

نورتي يا اختي
يسلم مرورك